Danny Titus (foto verskaf)
Danny Titus, voormalige uitvoerende hoof: korporatiewe aangeleenthede by die ATKV, is op 18 September in die ouderdom van 63 jaar oorlede.
Titus was sedert einde Julie in ’n koma nadat komplikasies ingetree het tydens ’n operasie om ’n katarak te verwyder.
Sonél Brits, besturende direkteur van die ATKV-MSW, sê dat sy afsterwe ’n groot leemte laat en dat dit ’n baie hartseer dag is.
Volgens Brits het Titus diep spore getrap in periodes van verandering – in Suid-Afrika en by die ATKV. Sy leierskap, integriteit en empatie sal haar altyd bybly.
“Hy was die regte man op die regte tyd.”
Die afgelope 12 jaar het hy hom beywer vir taal en kultuur. Saam met die ATKV het hy Afrikaans toegankliker en inklusiewer gemaak en daarvoor sal hy onthou word.
Dié regsman, taalman, historikus en meningsvormer se nalatenskap is een van groter begrip en inklusiwiteit oor die kleurgrense heen.
In 1983 is hy as advokaat tot die hooggeregshof toegelaat en het hy as staatsaanklaer by die departement van justisie gewerk.
Hy is in 1987 Nederland toe om sy studies aan die Universiteit van Leiden voort te sit en hy keer in 1993 met ’n meesters- en ’n doktorsgraad na Suid-Afrika terug.
In Februarie 2020 het hy as deel van sy geboortedorp, Worcester, se 200ste bestaansjaarvieringe die Freedom of the Town ontvang.
Titus was besonder trots op hierdie toekenning en het ná die toekenning geskerts en gesê: “Dit is vir my baie aangenaam. Jy leef jou lewe rustig en ander sien dit raak.”
“Ons gebede gaan veral uit na sy twee dogters, Daléne en Neriska,” sê Brits. “Ons gaan jou mis, dr Titus, en groet jou met groot respek en groot dankbaarheid vir die verskil wat jy gemaak het en die lewens wat jy aangeraak het.”
The post Persverklaring: Die ATKV groet ’n groot gees appeared first on LitNet.